ඩීසල්-පෙට්‍රල් වාහන නිෂ්පාදනය නැවතීමට චීනයේ අවධානය

Share Button

සාම්ප්‍රදායික ඉන්ධන වර්ග යොදා ගන්නා වාහන අලෙවිය නතර කිරීම සම්බන්ධයෙන් චීනයේ අවධානය යොමු වී තිබේ.

ඩීසල් සහ පෙට්‍රල් යන සාම්ප්‍රදායික ඉන්ධන යොදාගන්නා මෝටර් රථ අලෙවිය සහ නිෂ්පාදනය නවතා දැමීම සම්බන්ධයෙන් අවධානය කරමින් සිටින බව චීනයේ ෂින්හුවා පුවත් සේවය වාර්තා කරයි. ලොව විශාලතම මෝටර් රථ වෙළෙඳපොළ වන චීනය එම තහනම පනවන්නේ කවදාද යන්න තවම නිශ්චිතව ප්‍රකාශයට පත් කර නැත.

“සාම්ප්‍රායික ඉන්ධන, ඩීසල් සහ පෙට්‍රල් මෝටර් රථ වාහන අලෙවිය නවතා දැමීම සම්බන්ධයෙන් අපි අවධානය යොමු කර තිබෙනවා. ඒ සම්බන්ධයෙන් දැනටමත් අධ්‍යයනය කරනවා” යැයි චීනයේ කර්මාන්ත සහ තොරතුරු තාක්ෂණ නියෝජ්‍ය අමාත්‍ය ෂින් ගුබින් මහතා පැවැසීය. වසර 2040 සිට ඩීසල් සහ පෙට්‍රල් වාහන භාවිතය තහනම් කිරීමට එක්සත් රාජධානිය සහ ප්‍රංශය දැනටමත් තීරණය කර තිබේ.

“ඩීසල් සහ පෙට්‍රල් වාහන භාවිතය සහ නිෂ්පාදනය නවතා දැමීමට ඇතැම් රටවල් දැනටමත් තීරණය කර තිබෙනවා. ඔවුන් ඒ සඳහා දින වකවානුද ප්‍රකාශයට පත් කර අවසන්. අපි දැනටමත් අධ්‍යයනයක් ආරම්භ කර තිබෙනවා. එහි ප්‍රතිඵල අනුව සාම්ප්‍රදායික ඉන්ධන භාවිත කරන වාහන නිෂ්පාදනය සහ අලෙවිය නවතා දමන්නේ කවදාදැයි ද යන්න තීරණය කරනවා. එම පියවර අපේ මෝටර් රථ කර්මාන්තයට සුවිශේෂී වෙනස්කම් රැසක් සිදු කරාවි” යැයි ද නියෝජ්‍ය අමාත්‍යවරයා කීවේය.

වායූ දූෂණය අවම කිරීමට සහ ගෘහස්ථ මෝටර්රථ නිෂ්පාදකයන් සහ ගෝලීය මෝටර් රථ නිෂ්පාදකයන් අතර තිබෙන පරතරය අඩු කිරීමේ අරමුණින් 2025 වනවිට විදුලි සහ දෙමුහුන් (හයිබ්‍රිඞ්) මෝටර් රථ නිෂ්පාදනය සමස්ත වාහන නිෂ්පාදනයෙන් පහෙන් එකක් බවට පත් කිරීමට චීනය බලාපොරොත්තුවෙන් සිටියි.

Share Button

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *